Palagay nga.

Sa palagay ko, hindi ako mapalagay. Palagay ko lang ha, tulad ng palagay ko na imposible ang nakaparagang hubo, kaya nagiging negatibo ang resulta ng mga pinaggagagawa ng mga Pinoy ay dahil sa mga hebigat na drama na mapapanuod sa t.v. Malay mo kaya pala sinaksak ng kapit-bahay ko 'yung manugang n'ya kasi hindi n'ya matanggap na nabaliw na si rosalinda. Mas mainam pang manuod ng anime kaysa manuod ng mga drama na hinango kuno sa realidad, pero sa ngayon, hindi na uso ang madrastang magsusubsob sayo sa kubeta. Wala na sigurong step sister ang mang aagaw ng Jowa. Nakanangpotek. Palagay ko ang mga writer ng teledrama ngayon ay magkakamag-anak. Pareparehas lang ang kwento nila eh, naiba lang ang pangalan at lugar pero ang twist at daloy ng storya ay magkahugis.
Parang nakakatawa ng konti tulad ng ideya na nagbabayad ang iba para sa isang mahal na kapeng itatae mo rin naman. Sabagay entertainment value naman ang pinag uusapan, basta nahihipnotismo ka sa bakit-bakit na make-up ng bida eh matatawag nang patok ang drama, 'yung tipong magiging zombie ka sa harap ng t.v. tulad ng pagkahumaling natin sa laruang text at pog. Basta nahuhumaling ka sa kapapanuod- hindi na usap kung natawa ka, gumaan ang loob o nasira ang araw mo pagkatapos ang isang oras na panunuod, okey na 'yun. O kaya sobra sa hanep ang kasiguraduhan na papatok ang drama pag sikat ang artista, hindi na issue kung marunong itong magpapatak ng luha nang hindi tatama sa nunal sa ilong.

malamang napansin n'yu na ito:
1. Ang bida ay isang mahirap - kapartner n'ya ay isang mayaman na may ari ng isang acienda.

2. Step mother, step sister , dating kaibigan, kalaban sa pagandahan/patalinuhan sa iskul, nanay ng kasintahan - mga common kontrabida.

3. Kung hindi naman ka ano-ano ng bida ang kontrabida, may isang expected twist sa istorya- nawawalang kapatid niya ito. So magkapatid sila sa ama/ina na nagkahiwalay dahil sa sunog/bagyo/paglubog ng barko. Mas malala - magkakambal sila - hindi mo mawari kung paano nangyari iyon dahil saan mang anggulo ay magkaiba sila.

4. Ang babaeng bida ay ang childhood sweetheart ng lalaking bida. Dati silang magkapitbahay at magkalaro pero dahil yumaman na ang isa sa kanila, kailangan na nitong pumunta sa amerika ,hindi sa Saudi, hindi sa Canada, sa america lang talaga.

5. Syempre bago maghiwalay ang mag childhood sweetheart, may ibibigay ang lalaking bida sa babaeng bida- isang bracelet/kwintas/agimat/kutsilyo/toothpick.

6. May suisidal tendencies ang kontrabidang babae.

7. Ayaw ng magulang ng mayamang bida na makatuluyan nito ang love team nitong mahirap lamang. Aalukin ng pera ang huli para layuan ang anak nila.

8. Mag kukunwaring nabuntis ng bidang lalaki ang kontrabidang babae para lamang pakasalan ito- determination and obsession.

9. Ang nakabuntis sa kontrabidang babae ay isang hoodlum na mahilig magpunas ng baril at may kotseng itim na gagawin ang lahat para lamang sa kontrabidang babae, kasama na doon ang pagkidnap sa bidang babae at ilulublob ito sa isang drum ng tubig habang tumatawa ito at naninigarilyo.

10. Kung nagkataong parehas buntis ang bidang babae at kontrabidang babae, gagawin ng kontrabidang babae ang lahat ng kabaliw-baliw na paraan para lamang na maipalaglag ang dinadala ng una kasama na ang paglalagay ng holen sa hagdanan ng bahay ng babae.

11. Kung hindi natuloy ang plano at nanganak ang bida, ipapakidnap na lamang nito ang anak ng bida, syempre sa boypren nitong hoodlum na nabanggit sa number 9.

13. Aso't pusa ang drama ng dalawang bida sa umpisa pero magkikikire rin naman sa dulo. Kung paano sila nagkadebelopan, ganito 'yun: Nadulas kasi 'yung tangang bidang babae na obvious sa camera na sadya iyon at sasapuhin naman ito ng bidang lalake- tapos titigil ang paligid at magkukulay pula ang ulap. Hanep! slow-motion ang lahat- pero may loop-hole- yung nagbebenta ng fishball sa likod nila eh tuloy lang sa trabaho - palagay ko dapat islow motion din s'ya.

14. May bobang sidekick ang bidang babae na makakaparehas ng bestfriend ng bidang lalaki.

15. Laging may isang Bff na naka tango sa mga plano ng kontrabida. Lagi silang umiinom ng isang kopitang alak, halata namang pop colang may tubig lang iyun. Ito ang nagsisilbing researcher ng kontrabida tungkol sa favorite color at motto ng bidang lalaki.

16. Magiging marahas ang ending. Sasagipin ng bidang lalaki ang bidang babae dahil nga iginapos ito ng kontrabida. Magiging baliw ang kontrabida sa bandang huli.

17. Sasaksakin ng kontrabida ang babae sa ending - yung parang hostage drama ang effect. Kung hindi saksak, edi baril.

18. Mag aagawan sa baril/kutsilyo ang kontrabida sa ingkwentro nila. Syempre habang magkadikit sila biglang may puputok na hindi naman sakto sa pagkatulala nilang parehas tapos " itutuloy sa lunes......"

19. Syempre ang panghuli- ang pinaka huli- darating ang pulis. Hindi ko na matandaan kung sino ang nabaril.

Wala lang ako mapagtripan kaya naisulat ko ito.. hindi ko lang kasi matanggap na hindi makilalang si darna ay si narda na nilagyan lang ng pakpak sa noo at kapa sa panty.